Breaking News

குஜராத்தில் மூடப்படக்கூடிய அபாயச் சூழலில் உள்ள தமிழ்ப்பள்ளிகளைத் தொடர்ந்து செயல்பட தமிழக அரசு நடவடிக்கை எடுக்க வேண்டும்

மனிதநேய மக்கள் கட்சியின் தலைவர் பேராசிரியர் எம் எச் ஜவாஹிருல்லா வெளியிடும் அறிக்கை

நாடு விடுதலை அடைவதற்கு முன்பு தமிழகத்திலிருந்து தமிழர்கள் நெசவுத் தொழில் உட்பட்ட பல்வேறு காரணங்களுக்காக குஜராத்தின் தொழில் நகரமான அகமதாபாத்திற்கு இடம் பெயர்ந்தனர். .பிரதமர் நரேந்திர மோடியின் சொந்த தொகுதியான மணிநகரில் ஏராளமான தமிழர்கள் வசித்து வருகின்றனர். அங்கு அவர்களின் குழந்தைகளுக்காக தமிழ்வழிக் கல்வி பயில தொடக்கப் பள்ளிகள் தொடங்கப்பட்டன. பின்பு அகமதாபாத் தமிழர் நலக் கல்வி அறக்கட்டளையின் முயற்சியால் அகமதாபாத் தமிழ் மேல்நிலைப்பள்ளி(ATS) என்ற பெயரில் தொடங்கப்பட்டு அரசு உதவி பெறும் பள்ளியாக நடத்தப்பட்டு வருகிறது.
இந்நிலையில் மாறிவரும் ஆங்கிலமோகக் கல்வியின் தாக்கத்தால் நகராட்சியின் தொடக்கப்பள்ளிகளில் மாணவர்கள் எண்ணிக்கை குறையத் தொடங்கியதால் குஜராத் அரசு படிப்படியாக அப்பள்ளிகளை மூடியது.இதனைத் தொடர்ந்து மேல்நிலைப் பள்ளியிலும் மாணவர்கள் குறைந்து இப்போது 31 மாணவர்கள் மட்டுமே படிக்கும் நிலையில் உள்ளது.அரசு உதவி பெறும் பள்ளியைத் தொடர்ந்து நடத்துவதற்குக் குறைந்தபட்சம் 36 மாணவர்கள் தேவை என்ற நிலையில் அப்பள்ளியைத் தொடர்ந்து நடத்துவதில் சிக்கல் ஏற்பட்டு அதனை மூடியுள்ளார் மாவட்டக் கல்வி அலுவலர்.
தாய்மொழிக் கல்வியை முடக்கி அந்நிய மொழிகளின் ஆதிக்கத்திற்கு வழிவகுக்கும் புதிய தேசியக் கல்விக் கொள்கையின் தாக்கத்தை முன்கூட்டியே நாம் அறியும் வகையில் இந்த பள்ளியை மூடும் நிகழ்வு அமைந்துள்ளது. இதனால் மொழி தெரியாத ஊரில் சிக்கிக் கொண்டுள்ள தமிழர்கள் தங்களுடைய குழந்தைகளின் கல்வி குறித்து மிகுந்த மனவேதனை அடைந்துள்ளது நமக்கு வேதனையளிக்கிறது.

ஆகவே தமிழக அரசு மேலை நாடுகளின் பல்கலைக் கழகங்களில் தமிழ் இருக்கைகளை ஏற்படுத்தித் தமிழ் வளர்ப்பதற்கு இணையாக இந்திய மாநிலங்களில் நசுக்கப்படும் தமிழ்ப் பள்ளிகளின் மேல் அக்கறை கொண்டு உடனே குஜராத் அரசிடம் பேசி அங்குள்ள தமிழ்ப்பள்ளிகளில் தொடர்ந்து தமிழ் மாணவர்கள் படிப்பதற்குத் தேவையான அனைத்து நடவடிக்கைகளையும் எடுக்க வேண்டும் அதன் மூலம் தன்னிகரற்ற தமிழின் வளர்ச்சிக்கு உதவ வேண்டும் என்று கேட்டுக்கொள்கிறேன்.

இப்படிக்கு
எம் எச் ஜவாஹிருல்லா
தலைவர்

Check Also

தமிழ் முழக்கம் சாகுல் ஹமீது மரணம்: மனிதநேய மக்கள் கட்சி இரங்கல் மனிதநேய மக்கள் கட்சியின் தலைவர் பேராசிரியர் எம் எச் ஜவாஹிருல்லா வெளியிடும் அறிக்கை

நாம் தமிழர் கட்சியின் முக்கிய தலைமை நிர்வாகி தமிழ் முழக்கம் சாகுல் ஹமீது அவர்கள் இன்று மரணித்த செய்தி கடும் …

Leave a Reply

Your email address will not be published. Required fields are marked *