Breaking News

கீழடியும் – சிரியா நாணயமும் ஒரு மீள் பார்வை

விகடனில் ‘6 ‘ -ம் நூற்றாண்டில் சிரியா நாணயம் 17-ம் நூற்றாண்டு தங்க நாணயம்!’ – கீழடி ஆச்சர்யம்’ எனும் தலைப்பில் ஒரு செய்தி வெளியிட்டிருந்தது. இந்தச் செய்தி சமூக வலைத்தளங்களில் வைரலாகிதுடன் முஸ்லிம்களுக்கு மத்தியிலும் பரபரப்பாகப் பேசப்பட்டுவருகிறது. இது குறித்து அரபு வரலாற்று ஆவணங்களை ஆய்வு செய்து தொல்லியல் ஆய்வாளர் முனைவர் ராஜா முஹம்மது அவர்களுடன் விவாதித்து சென்னைப்பல்கலைக்கழகத்தின் அரபுத் துறைப் பேராசிரியர் அ.ஜாகிர் ஹுசைன் மக்கள் உரிமை வார இதழில் எழுதிய கட்டுரை.

17 ஜுன் 2020 அன்று விகடனில் ‘6 ‘ -ம் நூற்றாண்டில் சிரியா நாணயம் 17-ம் நூற்றாண்டு தங்க நாணயம்!’ – கீழடி ஆச்சர்யம்’ எனும் தலைப்பில் ஒரு செய்தி வெளியிடப்பட்டது.

இதில் இலந்தகரையில் 6ம் நூற்றாண்டைச் சேர்ந்த சிரியா நாணயம் கிடைத்துள்ளது என தொல்லியர் ஆர்வலர் ரமேஷ் ஜெமினி அவர்கள் கூறியதாக இந்தச் செய்தியில் குறிப்பிடப்பட்டிருந்தது. அத்துடன் இந்த சிரியா நாணயத்தின் படமும் வெளியிடப்பட்டிருந்தது.

இந்தச் செய்தி சமூக வலைத்தளங்களில் வைரலாகி வருகிறது. முஸ்லிம்களுக்கு மத்தியிலும் பரபரப்பாகப் பேசப்பட்டுவருகிறது. முதலில் இந்த நாணயம் கீழடி அகழாய்வின்போது கிடைத்த நாணயம் அல்ல. கீழடிக்கும் இந்த நாணயத்திற்கும் எந்தத் தொ ட ர் புமி ல்லை என்பதை புரிந்துகொள்ளவேண்டும். கீழடியிலிருந்து நாற்பது கிலோமீட்டர் தொலைவில் காளையர் கோவிலுக்கு அருகில் அமைந்துள்ள இலந்தகரை தொல்லியல் பகுதியில்தான் இந்த சிரியா நாணயம் இரண்டு ஆண்டுகளுக்கு முன்பு கிடைத்ததாக ரமேஷ் ஜெமினி தெரிவிக்கிறார். இது குறித்து தொல்லியல் ஆய்வாளர் முனைவர் ராஜா முஹம்மது அவர்களுடன் விவாதித்து அரபு வரலாற்று ஆவணங்களை ஆய்வு செய்து இந்த நாணயம் பற்றிய சில அடிப்படையான தகவல்களை உங்களோடு பகிர்ந்துகொள்கிறேன்.

6ம் நூற்றாண்டு நாணயம் அல்ல

இந்தச் செய்தியில் குறிப்பிடப்பட்டிருப்பதைப் போல இந்த நாணயம் 6-ம் நூற்றாண்டைச் சேர்ந்ததாக இருக்க வாய்ப்பில்லை. காரணம் இதில் திருக்குர்ஆன் வசனங்களும், இறைவன் ஒருவன், முஹம்மத் அவனுடைய இறைத்தூதர் உள்ளிட்ட அரபு வாசகங்களும் இடம்பெற்றுள்ளன. நபிகள் நாயகம் (ஸல்) அவர்கள் கி.பி. 570-ல் பிறந்தவர்கள். தமது நாற்பதாவது வயதில்தான் அதாவது கி.பி. 610-ல்தான் அவர்கள் இஸ்லாமிய மார்க்கப் பிரச்சாரத்தைத் தொடங்குகிறார்கள் என்பதை நாம் கவனத்தில் கொள்ளவேண்டும்.

இரண்டாயிரம் ஆண்டுகளுக்கு முன்பே தமிழர் அரேபியர் இடையே வணிகத்தொடர்பு இருந்துள்ளது என்பது தமிழ் அரபு இலக்கியங்கள் மூலமாகவும் வரலாற்றுத் தரவுகள் மூலமாகவும் உறுதிசெய்யப்பட்டிருக்கிறது. அந்த வகையில் தற்போது தமிழ் மண்ணிலிருந்து ஒரு அரேபிய நாணயம் கிடைத்திருப்பது தமிழர் அரேபியர் உறவுக்கு மேலும் வலுசேர்ப்பதாகவே அமைகிறது. மேலும் தமிழகத்தில் இஸ்லாமிய மார்க்கம் அமைதியாகப் பரவியிருக்கிறது என்தையும் உணரமுடிகிறது.

தங்க நாணயத்தை முதலில் அறிமுகப்படுத்திய கலீஃபா

உமைய்யா ஆட்சியின் ஐந்தாவது கலீஃபா அப்துல் மலிக் பின் மர்வான் பின் அல்-ஹகம். இவர் கி.பி. 646-ல் மதீனாவில் பிறந்தவர். கி.பி. 705-ல் சிரியாவிலுள்ள டமாஸ்கஸில் இறந்தார். கி.பி. 685-ல் ஆட்சிப் பொறுப்புக்கு வந்த இவர் 21 ஆண்டுகள் ஆட்சிப் புரிந்துள்ளார். இவர்தான் இஸ்லாமிய தங்க நாணயத்தை முதன்முதலில் அறிமுகப்படுத்தியவர். ஹிஜ்ரி 77-ல் (கி.பி. 696-ல்) முதல் இஸ்லாமிய நாணயம் நடைமுறைக்கு வந்தது. ஹிஜ்ரி 77-ல் இந்த நாணயம் வெளியிடப்பட்டதால் இது ‘தினார் 77’ என அழைக்கப்படுகிறது. இந்த நாணயம் 4.25 கிராம் எடை கொண்டது. அதற்குப் பிறகு பரவலாக ‘தினார்’ தங்க நாணயம் நடைமுறையில் இருந்ததை அறியமுடிகிறது. அதே சமயம் கலீஃபா அப்துல் மலிக் பின் மர்வான் உடைய காலத்திற்கு முன்பே அரேபிய நாணயங்கள் நடைமுறையில் இருந்துவந்துள்ளன என இஸ்லாமிய நாணய ஆய்வாளர் அப்துல்லாஹ் பின் ஜாஸிம் அல்முதைரீ குறிப்பிடுகிறார். இஸ்லாத்திற்கு முன்பு வாழ்ந்த அரேபியர்களும் நாணயங்களைப் பயன்படுத்தியிருக்கிறார்கள் என்ற குறிப்பையும் நாம் கவனத்தில் கொள்ளவேண்டும்.

இப்போது இலந்தகரையில் கிடைத்திருக்கும் நாணயம் கி.பி. 7-ம் நூற்றாண்டின் இறுதியிலும் 8-ம் நூற்றாண்டின் தொடக்கத்திலும் உமைய்யாக் காலத்தில் பயன்படுத்த ப்பட்ட ‘தினார்’ எனும் தங்க நாணயம் என்பது தெளிவாகிறது. நாணயத்தின் முன்பக்கம், முன்பக்கத்தின் ஓரம், பின்பக்கம், பின்பக்கத்தின் ஓரம், எடை, அளவு, காலம் அனைத்தும் ஒரே மாதிரியாக உள்ளன. இந்த நாணயத்தில் காணப்படும் துளை இங்குள்ள மக்களால் ஏதேனும் ஒருபயன்பாட்டிற்காக இடப்பட்டிருக்கலாம் . இன்றைக்கு சிரியாவின் தலைநகராக விளங்கும் டமாஸ்கஸ் நகரம்தான் உமைய்யா ஆட்சியிலும் தலைநகராக இருந்துள்ளது. எனவே இதை சிரியா நாணயம் என்று குறிப்பிட்டிருப்பதும் பொருத்தமாகவே இருக்கிறது. இப்போது நாணாணயத்தில் இடம் பெற்றுள்ள அ ர பு எழுத்துக்களைப் பார்ப்போம்.

இலந்தகரையில் கண்டெடுக்கப்பட்ட கி.பி.705-ம் ஆண்டு சிரியா ‘தினார்’ தங்க நாணயம் நாணயத்தின் முன்பக்கம்: நடுப்பகுதி :

லா இலாஹ இல்லல்லாஹு வஹ்தஹு லாஷரீ கலஹு
(அல்லாஹ்வைத் தவிர வேறு இறைவன் இல்லை. அவன்
ஒருவன். அவனுக்கு இணை இல்லை)

ஓரம்:

முஹம்மதுர் ரசூலுல்லாஹ் அர்ஸலஹு பில் ஹுதா வ
தீனில் ஹக்கி லி யுழ்ஹிரஹு அலத் தீனி குல்லிஹி
(முஹம்மத் அல்லாஹ்வின் தூதர். அவன் அவரை
நேரான வழி மற்றும் சத்திய மார்க்கத்தைக்கொண்டு
அனுப்பிவைத்தான். எல்லாமார்க்கங்களை அந்த
மார்க்கம் வென்றுவிடும்படி அவன் செய்தான்.)

நாணயத்தின் பின்பக்கம் – நடுப்பகுதி:

அல்லாஹு அஹத். அல்லாஹு ஸமத். லம் யலித். வலம்
யூலத்.
(இறைவன் ஒருவன். இறைவன் தேவையற்றவன்.
அவன் எவரையும் பெறவுமில்லை. எவராலும்
பெற்றெடுக்கப்படவுமில்லை). இது திருக்குர்ஆனின்
112ஆவது அத்தியாயத்தின் முதல் மூன்று வசனங்கள்.

ஓரம்:

பிஸ்மில்லாஹ் ழுரிப ஹாதத் தீனார் ஃபீ ஸனத்தி ஸித்திவ் வ ஸமானீன்
(இறைவனின் பெயரால். இந்த தினார் ஹிஜ்ரி 86-ல் அச்சிடப்பட்டது.)

22.06.2020 அன்று அமீரகத்தைச் சேர்ந்த பிரபல இஸ்லாமிய நாணய ஆய்வாளர் அப்துல்லாஹ் பின் ஜாஸிம் அல்முதைரீ அவர்களை இ ன்ஸ்டாகிராம் மூ ல ம் தொடர்புகொண்டு இந்த நாணயம் குறித்து விவாதித்தேன். அப்போது அவர்கள் இந்த நாணயம் ஹிஜ்ரி 86-ல் அதாவது கி.பி. 705-ல் அச்சிடப்பட்ட உமைய்யாக்கள் கால நாணயம் என்பதை உறுதிசெய்தார்.

மேலும் கலீஃபா அப்துல் மலிக் பின் மர்வான் பின் அல்-ஹகம் ஹிஜ்ரி 86-ல் (கி.பி.705-ல்) ஆட்சியில் இருக்கும்போது மரணமடைந்தார். அவருக்குப் பிறகு அதே ஆண்டில் அல்-வலீத் பின் அப்துல் மலிக் ஆட்சிக்கு வந்தார். அவர் மரணித்ததும் இவர் ஆட்சிக்கு வந்ததும் ஓரே ஆண்டு என்பதால் இந்த நாணயம் இவ்விருவரில் ஒருவருடைய காலத்தில் வெளியிடப்பட்டிருக்கலாம் என்றும் தெரிவித்தார்.

கலீஃபா அப்துல் மலிக் பின் மர்வான் பின் அல்-ஹகம் அறிமுகப்படுத்திய 7-ம் நூற்றாண்டைச் சேர்ந்த ‘திர்ஹம்’ வெள்ளி நாணயமும், கலீஃபா ஹிம் பின் அப்துல் மலிக் அறிமுகப்படுத்திய 8-ஆம் நூற்றாண்டைச் சேர்ந்த ‘ஃபில்ஸ்’ செம்பு நாணயமும் கீழே தரப்பட்டுள்ளன.

7-ஆம் நூற்றாண்டைச் சேர்ந்த ‘திர்ஹம்’ வெள்ளி நாணயம் 8-ஆம் நூற்றாண்டைச் சேர்ந்த ஃபில்ஸ்’ செம்பு நாணயம் உமைய்யாக்கள் கால நாணயங்களைப் போலவே அப்பாசியாக்கள் ஆட்சிகாலத்திலும் (கி.பி. 750 &- கி.பி.1258) அரபு எழுத்துக்களும் திருக்குர்ஆன் வசனங்களும் பொறிக்கப்பட்ட நாணயங்கள் பயன்பாட்டில் இருந்துள்ளன.

இஸ்லாம் தோன்றுவதற்கு முன்பிருந்தே பல நூற்றாண்டுகளாக தமிழர்களும் அரேபியரும் ஆழமான வணிகத் தொடர்பை மேற்கொண்டிருந்தார்கள். அந்த வகையில் உமைய்யா ஆட்சி காலத்தில் அறிமுகமான ‘தினார்’ தங்க நாணயம் தமிழ் மண்ணில் கிடைத்திருப்பது கூடுதல் கவனம் பெறுகிறது. பண்டமாற்று முறையில் இந்த தங்க நாணயம் தமிழ்நாட்டிற்குக் கொண்டுவரப்பட்டிருக்கலாம். அந்த வகையில் இவ்விரு சமூகங்களுக்கிடையிலான உறவை இது மேலும் வலுப்படுத்துவதாக உள்ளது. இலந்தகரையில் அகழாராய்ச்சி விரிவுபடு த்தப்பட்டால் ஏராளமான தொல்பொருள்கள் கிடைக்க வாய்ப்புண்டு.

நாம் ஏற்கெனவே குறிப்பிட்டதைப்போல இஸ்லாம் தோன்றுவதற்கு முன்பிருந்தே அரேபியர் தமிழர்களுக்கிடையே வணிகத் தொடர்பு உருவாகியிருக்கிறது. ஆரம்ப காலங்களில் ரோம, கிரேக்க நாடுகளின் வணிகத்துக்கு துணையாக இருந்த அரேபியர்கள், ரோம, கிரேக்க சாம்ராஜ்யங்களின் வீழ்ச்சிக்குப் பிறகு தமிழகத்துடன் நேரடி வணிகத்தில் ஈடுபபடத்தொடங்கினர். அதுவரை வெளிநாட்டு வணிகர்கள் அனைவரையும் குறிக்கும் பொது சொல்லாக இருந்த ‘யவனர்’ என்னும் சொல் கி.பி. 3-ஆம் நூற்றாண்டிற்குப் பிறகு அரபுகளைக் குறிக்க மட்டுமே பயன்படுத்தப்பட்டது.

யவனர் நன்கலம் தந்த தண்கமழ் தேறல்’ (புறம் 86), ‘யவனர் தந்த விணைமாணன்கலம்’ (அறம் 149) உள்ளிட்ட சங்க இலக்கிப் பாடல்களை இந்த இடத்தில் குறிப்பிடுவது பொருத்தமாக இருக்கும்.

வணிகத்தில் உருவான அரேபியர் தமிழர் உறவு நாளடைவில் கலை, இலக்கியம், பண்பாடு என விரிந்து வலுப்பெற்றது. அதன் தாக்கம் இவ்விரு சமூகங்களிலும் இன்றைக்கும் காணப்படுகிறது.

தமிழ் – அரபி ஒற்றுமை

இவ்விரு மொழிகளிலும் காணப்படும் பல எழுத்துக்களின் வடிவம் ஏறக்குறைய ஒரே மாதிரியாக உள்ளன. அதேபோல இரத்த உறவுகளைக் குறிக்கும் பல சொற்கள் இரண்டு மொழிகளிலும் ஒரே விதமாகக் காணப்படுகின்றன.

உதாரணமாக:

அம்மா – உம்மு
அப்பா – அப்
அக்கா – உக்த்
தாத்தா – ஜத்
ஆகியவற்றைக் குறிப்பிடலாம். மேலும்
ஆம் – நஅம்
இல்லை – இல்லா, லா

ஆகிய சொற்களும் கிட்டத்தட்ட ஒரே மாதிரிய இருக்கின்றன. இதைத்தவிர நூற்றுக்கணக்கான அரபுச் சொற்கள் தமிழில் கலந்து நமது அன்றாட வாழ்க்கையில் இன்றளவும் பயன்படுத்தப்பட்டு வருகின்றன. பெரும்பாலான தமிழ்மக்கள் அவை அரபுச்சொற்கள் என்ற வேறுபாடு தெரியாமல் தமிழ்ச்சொற்களைப் போலவே பயன்படுத்திவருகிறார்கள். அந்த அ ள வி ற் கு அரபுச் சொற்கள் தமிழில் இரண்டற கலந்துள்ளன.

உதாரணமாக:

அமல், அத்து (அத்து மீறுதல்), நபர், முகாம், கைது, பாக்கி, தகராறு, சவால், ஆஜர், வக்காலத்து, ஷரத்து, இனாம், மகசூல், வசூல், ஜாமீன், வக்கீல், ஆபத்து, அல்வா, கதர், சர்க்கரை, தரப்பு, ரசீது, அத்தர், காலி, கஜானா, ரத்து, இலாக்கா, ஜில்லா, மக்கர், சர்பத், சிறப்பு உள்ளிட்ட ஏராளமான சொற்கள் பயன்பாட்டில் உள்ளன. அவ்வாறே அரிசி, மாங்காய், சுவர் போன்ற தமிழ்ச்சொற்கள் அரபுமொழியில் காணப்படுகின்றன.

த மி ழ் ‘ழ’ மொ ழி எ ன் று அழைக்க ப்படுகிறது. ‘ழ’ தமிழ் மொழியின் சிறப்பு எழுத்தாகப் போற்றப்படுகிறது. இவ்வாறே ஒலியிலும் வடிவத்திலும் ஏறக்குறைய ஒரே மாதிரியாகக் காணப்படும் ض ‘ அரபுமொழியின் சிறப்பு எழுத்தாகக் கருதப்படுகிறது. ض போன்ற சில அரபு எழுத்துக்களுக்கு மேலும் கீழும் புள்ளிகள் பயன்படுத்தும் நடைமுறை பிற்காலத்தில் தோன்றியதாகும். தொடக்கத்தில் இந்த ‘புள்ளி’ நடைமுறை கிடையாது என்பதையும் நாம் இத்துடன் இணைத்துப் புரிந்துகொள்ளவேண்டும். இந்த உறவின் ஒரு பகுதியாகவே அரபு – தமிழ் எனும் புதிய மொழி வடிவம் உருவானது என்பதையும் அறியமுடிகிறது.

தொல்லியல் ஆய்வாளர் முனைவர் ராஜா முஹம்மது
தொல்லியல் ஆய்வாளர் முனைவர் ராஜா முஹம்மது

சாமண்ணன் யார்?

சென்னைப்பல்கலைக்கழக அரபு, பாரசீகம், உருதுத்து றை யி ன் மேனாள் தலைவர் பேராசிரியர் பி. நிசார் அகமது அவர்கள் நீண்ட நாட்களுக்கு முன்பு என்னிடம் ஒரு செய்தியைச் சொன்னார்கள். ராணிப்பேட்டைக்கருகில் உள்ள கிராமத்தின் தலைவாசலில் இரண்டு மனிதர்களின் சிலைகள் காணப்பட்டன. அந்தக் கிராம மக்களிடம் இதுபற்றி விசாரித்தபோது இவை ‘ஹாமண்ணன்’, ‘சாமண்ணன்’ சிலைகள் என்று தெரிவித்தார்கள். இப்போது அந்த சிலைகள் அங்கு இல்லை.

இறைத்தூதர் நூஹ் (அலை) அவர்களுடைய முதலாவது மகன் ‘ஹாம்’ இரண்டாவது மகன் ‘சாம்’. இந்த ‘சாம்’ என்பவருடன் இணைத்துதான் சாமிய மொழியில் அறியப்படுகிறது. அரபுமொழியும் சாமிய மொழி குடும்பங்களில் ஒன்று. ‘சாம்’தான் அரேபியர்களின் தந்தையாக அறியப்படுகிறார். இவரது ஐந்தாவது தலைமுறை கஹ்தான். இவருடைய பரம்பரையினர்தான் கஹ்தானியர்கள் எனும் பூர்வீக அரேபியர்கள். கஹ்தானுடைய மகன் ‘யஅரிப்’ என்பவர்தான் அரபுமொழியின் தந்தை என அறியப்படுகிறார். இவருடைய பெயரிலிருந்துதான் (யஅரிப்) ‘அரபு’ எனும் சொல் வந்தது என அரபுமொழியியல் அறிஞர்கள் கூறுகிறார்கள். பல நூற்றாண்டுகளுக்கு முன்பு வாழ்ந்த அரேபியர்களின் தந்தையாகக் கருதப்படக்கூடிய ‘சாம்’ தமிழகத்தில் எப்படி அறியப்பட்டார்? ‘சாமண்ணன்’ என்ற பெயர் இன்றைக்கும் தமி ழ்ப்பெயராக எ வ்வாறு பயன்படுத்தப்படுகிறது? போன்ற கேள்விகளுக்குத் தொல்லியல் ஆய்வுகள் மூலமாகத்தான் விடை கிடைக்கும்.

மேலும் பேராசிரியர் ராஜா முஹம்மது போன்ற அறிஞர்கள் இந்த நாணயத்தையும் இத்துடன் தொடர்புடைய தரவுகளையும் ஆய்வு செய்தால் இன்னும் கூடுதல் வெளிச்சம் கிடைக்கும்.

Check Also

தொல். திருமாவளவன் அவர்களின் சகோதரி பானுமதி அம்மையார் மரணம்! மனிதநேய மக்கள் கட்சி இரங்கல்!!

விடுதலை சிறுத்தைகள் கட்சி தலைவர் தொல். திருமாவளவன் அவர்களின் சகோதரி பானுமதி அம்மையார் மரணம்! மனிதநேய மக்கள் கட்சி இரங்கல்!!.

Leave a Reply

Your email address will not be published. Required fields are marked *